Obra en aragonés ribagorçano

Descripción

Dámaso Carrera va ser sin denguna duda l’iniciador del cuento en aragonés. É comprensiblle que la literatura d’autor en aragonés tienga en la Ribagorça el suyo origen, ya que tamé la literatura anónima, sobre tot las Pastoradas, son quasi totas producidas en aragonés ribagorçano. Pero a més d’ixe heréncio prévio, regular qu’en el ferrero de Graus hi va intervenir un atro elemento dinamizador que no cal fer de menos: las suyas primeras obras son de resultas de la preséncia de Saroïhandy, que’n el suyo primer viage ta Graus, en 1896, li demanda que l’escriva bel rellato tradicional pa fer-se una ideya de cómo é la llengua ribagorçana.
Carrera apllegará rellatos fictícios, u sucedius, de la tradicion oral grausina, pero dimpués en producirá tamé narracions própias, sempre de caracter costumbrista –pllenos d’homes del campo, de mullers aixeridas i de mosens servicials– que publlicará en El Ribagorzano.