Descripción
O poemário Ixe buxo viello (entre fierros) obtenió en 1988 o prestigioso prémio de poesia «Ana Abarca de Bolea» pa libros escritos en aragonés e decamin a critica literária lo emponderó ubiertament, més que més, per la suya modernidat. Se tratava d’una propuesta séria de renovacion d’a poesía que s’heva escrito en este idioma dica alavez.
Coincidindo con o venteno aniversário d’a suya publicacion e aproveitando que yera acorato dende feva muito tiempo, Xordica editorial lo torna á editar en esta segunda edicion –s’ha corregito bel vocable, bel verso e s’ha adoptato una grafia més coherent con a história de l’aragonés–, edicion que o própio autor considera como definitiva.
Pa que os lectors continúen disfrutando-ne.
Chusé Raúl Usón
Zaragoça, 1966
Ha publicato un buen numbro d'obras poeticas:
Dezinueu repuis d'una bida dallata (1986),
Ixe buxo viello –entre fierros– (1988; 2ª edicion, Xordica, 2008),
Luna, arto y poemas de bardo (1989),
Fuellas chobenas (1991),
Cruzillata (1994) e
Candalieto (2006); os dietários
As zien claus (1997) –traducito a l'asturiano como
Les cien llaves (2004)– e
Enruenas (2008), asinas como los relatos
Nueis d'agüerro (1986),
Trista boira baxa (1989),
Benzina (2003) e
Navalla, botas, vacas (2008). Ye o traductor de
Cullita d'otri (1998), una antologia de poesia contemporánia occidental asinas como d'una ripa d'obras infantils e jovenils. Tamien ye o editor de
Dovina, dovinalla (2009), libro
pa ninos que replega adivinetas populars en iste idioma, e de La fiesta del árbol (2009), libret qu'escrivió o mayestro belsetan Leonardo Escalona e que ha redescubierto agora. Junto a Xavier Tomás ha escrito lo volumen de caracter etnolingüistico El Carnaval de Torla (Xordica, 2009).
Apresta agora En versos de cobre, una antologia de poesia contemporánia en aragonés.
Articulista, editor, ye miembro d'a Sociedat de Lingüistica Aragonesa e secretário d'a revista filologica De Lingua Aragonensi.
Valoraciones
No hay valoraciones aún.